A Plataforma pola Protección da Serra do Galiñeiro, da que fai parte Verdegaia, vén de apresentar alegacións ó Proxecto de parque eólico da Serra do Galiñeiro. Dende a nosa asociación tamén colaboramos co resto de colectivos da Plataforma para recoller as máis de 8000 alegacións de cidadáns individuais que asinaron unha alegación contra este impactante proxecto.
A pesar das dificultades que a Administración nos puxo, dende a Plataforma preparamos un extenso argumentario ante as distintas infraccións nas que o proxectado polígono eólico incorrería na serra do Galiñeiro.
O prazo para preparar o documento de alegación foi de só un mes, do que os primeiros días non tiñamos practicamente acceso ao proxecto, ao tratarse este de un extenso documento de centos de páxinas e planos que só podiamos consultar nas oficinas dos concellos ou da consellería de industria. O documento dixitalizado tivo que ser pedido á Xunta e conseguido con esforzo. Foi só na última semana, e cando se nos comunicou que non daban ampliación do prazo de alegacións, que nos enviaron o Proxecto en formato dixital.
Esta Plataforma conseguiu redactar en poucos días e coa adicación do tempo libre dos seus membros, un traballo máis exhaustivo do que fixeron no gabinete de redacción do estudo de impacto de Terra do Vento, que nalgúns aspectos é unha redacción teórica copiada de diversas fontes e sen estudo de campo.
Os estudos de impacto son encargados como trámites, e aínda que en ocasións son estudos feitos por profesionais serios, noutros casos coa súa desidia burlan e desprezan os valores desta serra.
Queremos dar as grazas unha vez máis a toda a xente que colaborou asinando a alegación persoal pedindo a retirada do Proxecto de Parque eólico na serra do Galiñeiro. Grazas a todas e todos eles, presentamos máis de 8.000 alegacións.
