En Xaneiro, dentro da Campaña 12 Meses, 12 Invasoras: campaña anual para combater a perda de biodiversidade realizaremos unha actividade de eliminación de Xuncia (Cyperus eragrostis) en Vilaboa.

Empezamos a campaña ‘12 Meses, 12 Invasoras’ adicando o mes de Xaneiro a unha especie que leva anos conquistando as marxes dos nosos ríos impedindo o desenvolvemento das especies autóctonas, a Xuncia (Cyperus eragrostis).

Así, este Domingo 29 de Xaneiro imos realizar unha actividade de eliminación desta planta en Vilaboa, concretamente no río Maior. Un espazo natural moi ben conservado pero que tamén experimenta o azote das Especies exóticas invasoras (EEI).

Combinamos ás 11h. diante da Casa da cultura de Riomaior (42°19’27.1″N 8°39’21.7″W). A participación é gratuíta e a organización prestará as ferramentas e as luvas necesarias.

Para ir coñecendo o ‘inimigo’ ao que nos imos enfrontar, na ficha adxunta podemos observar como a Xuncia é unha das varias EEI que basea o seu potencial de colonización no potente rizoma que posúe. O rizoma é unha parte subterránea da planta que funciona como un reservorio de enerxía polo que, se nos limitamos a cortar a parte aérea da planta, esta volverá a rebrotar infinidade de veces. Isto implica que nunha acción de erradicación sexa fundamental:

  • perforar o solo uns 20 cms ata atopar o rizoma;
  • extraer o rizoma na súa totalidade porque se deixamos un anaco, por pequeno que sexa, a Xuncia será capaz de rexenerarse;
  • incinerar o rizoma para que non volva a entrar en contacto co solo, o modo máis simple é introducilo nunha bolsa, pechala ben e tirala no contedor de lixo xenérico. Se SOGAMA é especialista en algo… é en queimar!

Lembra que antes de actuar é importante ter moi claro todo o proceso. En caso de dúbida contáctanos ou envíanos a localización do exemplar que tes localizado para que nunha próxima ocasión poidamos proceder á súa eliminación.

A campaña ‘12 meses, 12 invasoras’ decorrerá ao longo de 2023 co obxectivo de visibilizar o problema que supoñen as Especies exóticas invasoras (EEI).
   Cada mes destacamos unha das EEI máis problemáticas para os ecosistemas galegos:
- dando pistas de identificación
- explicando técnicas de eliminación
- organizando actividades de eliminación en espazos de especial valor ecolóxico

Moeda Social A Sabia

Verdegaia colabora coa moeda social A Sabia na procura de crear sinerxías entre persoas e redes sociais, comunitarias, solidarias e ambientais fomentando o consumo de proximidade baseado na confianza e o apoio mutuo, e procura favorecer o pequeno comercio e o autoemprego.

A Sabia ofrece, ás persoas voluntaria que o desexen, unha cantidade en moeda social que poderán recibir na súa conta cada vez que participen nunha actividade como a desta convocatoria.

Para poder recibir a moeda hai que abrir unha conta na aplicación Cyclos: e enviar un email a compostela@verdegaia.org ou un correo á conta de cyclos de Verdegaia informando do seu interese en recibir a moeda.