O Venres 23 de Marzo Verdegaia Ourense vai celebrar, a partir das 19:30 horas, na Aula Magna do edificio politécnico da Universidade o Día Mundial da Árbore, coa intención de difundir na poboación da nosa provincia un sentimento de amor e coidado da natureza e en especial das árbores.
Co lema, protexer os nosos bosques é cousa de tod@s, a Asociación Ecoloxista fará fincapé no problema dos incendios, calamidade que ano tras ano demostra que é o grande problema ecolóxico e social do país, e que somentes poderemos rematalo coa axuda de toda a sociedade.
Verdegaia contará coa colaboración da Escola Provincial de Danzas, que dará un recital de cantigas todas elas relacionadas coas árbores, dando así un exemplo da interrelación do home coa natureza.
