cartaz-solo-mundo-web.jpg

O domingo 16 realizarase o primeiro roteiro, desta volta polo río Fondón

Galiza dispón dunha riqueza natural, cultural e paisaxística só comparábel ás barbaridades que tristemente tamén podemos atopar con certa facilidade… encoros, autoestradas, explotacións mineiras, etc. Co dobre obxectivo de coñecer o noso territorio e denunciar moitas das desfeitas que están a degradalo, Verdegaia pon en marcha unha nova edición, a cuarta, do seu programa “Vai de roteiros!”.

Deste xeito, o vindeiro domingo 16 de outubro, Verdegaia e a asociación cultural Alén Nós organizarán un roteiro polo río Fondón e o Monte Penide. Quedaremos ás 11:00 h. na Igrexa de Trasmañó punto ó que volveremos arredor de cinco horas máis tarde, tras percorrer primeiro o río Fondón ata as brañas do seu nacemento e logo todo o complexo megalítico de Monte Penide; remataremos sobre as 16:00 h. sendo o roteiro de dificultade media.

@s asistentes ó roteiro poderán coñecer os principais ecosistemas deste valioso espazo natural así como a súa flora e fauna. Salientan os bosques de ribeira e especies como a saramaganta (Chioglossa lusitanica), e tamén pola parte patrimonial sobresaen a asombrosa cantidade de muíños, mámoas e petróglifos na contorna de Monte Penide cara ó Vixiador e as asombrosas vistas dende os numerosos petróglifos e dende o Castro de Negros. Tamén falaremos das dificultades para a conservación deste espazo e dos principais problemas e impactos ós que ten que facer fronte: vertidos, aterros ilegais, especies invasoras, etc.

Para o roteiro do vindeiro domingo é inprescindíbel no esquecer calzado axeitado e a comida que tomaremos na zona do Castro de Negros. Se queredes compartir coche ou ir en transporte público cómpre facelo saber para poder recoller e xestionar a toda a xente que o poida precisar.

En termos máis xerais, no programa “Vai de roteiros!” cada terceira fin de semana do mes, un dos núcleos comarcais de Verdegaia será responsábel da organización e realización dun roteiro no que divulgar os valores naturais, culturais e etnográficos das zonas visitadas, dar a coñecer e denunciar as desfeitas que se detectan nas zonas polas que transcorra o roteiro, fomentar a participación cidadá en actividades relacionadas coa natureza, ser un elemento de ocio máis ofertado gratuitamente á cidadanía, e fomentar o traballo conxunto entre asociacións, entre outras finalidades.

Espazos litorais como a enseada de San Simón ou a lagoa e areal de Valdoviño; treitos fluviais coma as ribeiras do río Arnoia, as ribeiras do Fondón, o río Toxa ou o curso alto do río Sor; e serras como as do Cando ou o Pico Sacro serán o marco natural no que poder observar a fauna, a flora, as formacións xeolóxicas ou os vestixios dunha cultura, a labrega, que no seu momento respectou os ciclos da natureza. Do mesmo xeito, será difícil non ver a ocupación urbanística no litoral, ou os impactos das infraestruturas hidráulicas nos ríos e das canteiras nas serras, entre outras mostras do actual modelo de progreso…

 

Os roteiros serán anunciados coa suficiente antelación na nosa páxina web (www.verdegaia.org ), na que poderedes atopar tamén información máis detallada sobre cada un deles (desprazamentos, lonxitude, dificultade, etc.).

 

 

Programa 2011-2012

  • Outubro 2011: río Fondón (Nc de Vigo).
  • Novembro 2011: curso alto do río Sor (Nc de Ferrol).
  • Decembro 2011: río Arnoia (Nc de Ourense).
  • Xaneiro 2012: Pico Sacro (Nc de Compostela).
  • Febreiro 2012: enseada de San Simón (Nc de Vigo).
  • Marzo 2012: lagoa e areal de Valdoviño (Nc de Ferrol).
  • Abril 2012: río Toxa (Nc de Compostela).
  • Maio 2012: Santa Cristina de Ribas de Sil (Nc de Ourense).
  • Xuño 2012: serra do Cando (Nc de Pontevedra).

 

Para máis información:

 

  • Información sobre o programa “Vai de roteiros!”: Diego R. Vieites (670 784 919), Secretario Xeral e Responsable da Área de Biodiversidade de Verdegaia.

 

  • Información sobre o roteiro do 16-10-11: Roi Seoage (661 240 605), vicecoordenador do Núcleo Comarcal de Verdegaia en Vigo.

 

vai-de-roteiros-2012_p.jpg