O pasado domingo 15 de maio, Verdegaia celebrou o penúltimo roteiro do actual programa Vai de roteiros. Discorreu ao lado do río Miño no seu paso por Ourense.
Asistiron 7 persoas e dúas cadelas a este roteiro. Comezou na ponte romana, de onde se foi pola beira esquerda do río ata as pozas de Outariz. Desde alí continuamos pola beira dereita do río Miño ata o cámping de Untes, onde paramos para comer e repor forzas.
Ao longo do roteiro explicouse a situación actual das beiras do Miño (contaminación por desaugues directos, falta de depuración, estado da depuradora de Reza, vexetación invasora -acacias-, asfaltados innecesarios, etc.).
Foi un roteiro moi suave en canto á dificultade e que nos fixo pasar un agradable domingo.
Agradecémoslle a todas as persoas a súa asistencia e o bo ambiente presente ao longo de todo o roteiro.
