Dende o núcleo comarcal de Verdegaia-Vigo vimos de presentar unha denuncia perante a Confederación Hidrográfica do Miño-Sil polos verquidos que veciñas da localidade do Porriño teñen detectado nos pasados días 1 e 8 de agosto nas augas do río Louro. Na tardiña de ámbolos dous domingos a empresa Frigolouro ten realizado verquidos compostos por restos orgánicos, sangue e lixivias, provintes posiblemente da limpeza dalgunha das salas desta industria cárnica. 

 O feito de que se teña realizado nun día non laborable e a reincidencia do asunto parecen deixar claro que non se trata dun suceso accidental. Isto contrasta coa nova aparecida recentemente nos xornais de que dende o 23 de xullo esta empresa pasaba a conectarse á rede de sumidoiros da EDAR (Estación Depuradora de Augas Residuais) de Guillarei, co que deixaría de verquer as súas augas residuais directamente ao Louro, como ten realizado por décadas. O máis irónico é que esta nave de matadoiro, despece e procesado, está situada no centro desta vila,  xusto fronte á delegación provincial da antedita Confederación Hidrográfica, que se atopa na outra beira do río. Non parece casual pois que os verquidos teñan sucedido en dous domingos consecutivos.

Por todo isto, queremos tamén manifestar o noso apoio á campaña iniciada por algunhas veciñas do Porriño para denunciar perante a opinión pública este tipo de actuacións, que atentan contra o medio ambiente e o patrimonio común de todas. Como parte desa campaña estas veciñas teñen iniciado unha recolla de firmas e pretenden concentrarse semanalmente, cada xoves a partires das 21h, no xardín situado da outra beira do albergue de peregríns, xusto a carón de Frigolouro, para reclamar un río máis limpo e libre de verquidos.

Por outra banda, dende o núcleo comarcal de Verdegaia-Vigo imos  comezar un seguemento das augas deste río, que forman nesta área xeográfica o Lugar de Interese Comunitario (LIC) das Gándaras de Budiño e das Ribeiras do Louro. O obxectivo é realizar unha análise periódica da calidade das súas augas antes e despois do seu paso polo núcleo urbano e as zonas industriais deste municipio, observando, mediante indicadores como a presenza de macroinvertebrados, a evolución do seu estado, toda vez que tras varios anos de parón ten comezado a funcionar o sistema de recolla e depuración de augas da EDAR de Guillarei. Temos que recordar que apesares da súa situación límite e de anos de agresións, as ribeiras do Louro aínda gardan un ecosistema dun enorme valor ambiental.

foto_do_verquido_de_frigolouro.jpg