As Pontes 2023: Operación Lago, O noso monte, o noso futuro e Non nos quitaredes os soños, as curtas gañadoras do Revoltallo Audiovisual 2014.
O pasado mércores 21, no local da AA.VV. A Xuntanza, tiveron lugar as proxeccións e concurso de curtas do Revoltallo Audiovisual 2014, que organizamos en Compostela xunto a este colectivo veciñal e Amarante Setem.
Nun ambiente familiar e distendido, con presencia de moitas das persoas que realizaron os traballos a concurso, pasamos as oito curtas seleccionadas para o certame:
As Pontes 2023: Operación Lago.
Desiderata.
O foxo do lobo de Sabaxáns e a súa problemática.
Verbas.
El Virus
Democracia.
Non nos quitaredes os soños.
O noso monte, o noso futuro.
Finalmente, tras votación do propio público, as curtas gañadoras foron as seguintes:
Empatadas no terceiro e segundo premio:
As Pontes 2013: Operación Lago.
Unha obra colectiva dirixida por Sabela Pernas e Xosé Alberte López, que ironiza sobre o lago artificial xerado no oco da antiga mina de lignitos.
O noso monte, o noso futuro.
Produto dun traballo escolar do IES Xulián Magariños de Negreira, realizado por Rocío Iglesias, José Vicente Julia-García, José Rugido, Alba Tuñas e Adrián Vidal, baixo o coidado da profesora María Blanco. O alumnado escolleu achegarse ao tema do monte tras da vaga de lumes que no pasado verán afectaron á contorna deste concello.
O primeiro premio foi para:
Non nos quitaredes os soños, que parte tamén do alumnado do IES Xulián Magariños, neste caso realizada por Alba García Ardións e Ariana Golán Garrido. Esta peza trata de transmitir como vive unha adolescente o desafiuzamento do seu fogar familiar e é unha denuncia ao papel da banca nestes casos.
Os premios consistiron nunhas cestas con produtos de comercio xusto e ecolóxicos (do mercado do Lusco e Fusco) e libros e camisolas dos nosos colectivos.
