O día 3, xoves, dará comezo un ciclo de video-fórum que en Ribeira organizan conxuntamente Verdegaia, a ANPA Caramecheiro (Instituto nº 1) e o Ateneo Valle Inclán. As películas escollidas abordan temáticas relacionadas co actual modelo de desenvolvemento e as súas consecuencias ambientais e sociais.
Ao remate de cada proxección abrirase un debate sobre o tema abordado na mesma.
O ciclo desenvolverase do 3 de febreiro ao 23 de xuño no local do Ateneo Valle Inclán (Bar Plaza), cunha periodicidade mensual e en horario de 8 da tarde. A entrada é de balde.
Con esta actividade, dende as entidades organizadoras preténdese encher un oco no noso pobo, ofrecendo un lugar para o coñecemento, a reflexión e o debate acerca de diferentes problemáticas sociais e ambientais.
As películas que compoñen o ciclo son as seguintes:
-
“A historia das cousas”, de Annie Leonnard. Esta curta de 20 minutos que abre o ciclo móstranos as consecuencias que sobre a comunidade teñen todos os obxectos que mercamos, usamos e dos que nos desfacemos. É unha ollada ao lado oculto dos nosos patróns de consumo. (3 de febreiro)
-
“A débeda ecolóxica: quen debe a quen?”, de Ecoloxistas en Acción. Constantemente oímos falar da débeda financeira dos países do Sur con bancos e gobernos do Norte. Esta peli pídenos que reflexionemos e, tendo en conta a débeda ecolóxica do Norte co Sur, nos preguntemos, realmente, quen debe a quen. Duración aproximada de media hora. (3 de marzo)
-
“O poder da comunidade”, de Arthur Morgan Institute for Community Solutions. Fala do pico do petróleo, e de como un país que de algún modo xa o viviu (Cuba) o enfrontou, por se algunha das súas experiencias nos poden servir como modelo. 53 ‘ (31 de marzo)
-
“Xares, o río que nos leva”, de Pedro Prada Blanco. Longametraxe dedicada aos encoros e aos pobos que desapareceron baixo deles en aras dun mal entendido progreso. (28 de abril)
-
“Ola, estás facendo unha peli”; unha orixinal experiencia de creación colectiva que bota unha mirada chea de frescura ao mundo da inmigración. 42 ‘ de duración. (26 de maio)
-
“Amazonia, masato ou petróleo”, de Josep Ramón Giménez, documental de case unha hora de duración que quere mostrar o menosprezo dos poderes políticos e económicos cara a selva e os seus pobladores. É unha denuncia das políticas en contra dos indíxenas, e do expolio que as multinacionais fan dos recursos dun territorio que, a fin de contas, é seu. (23 de xuño).
Os documentais programados distribúense libremente, e todos eles están postos a disposición de todo o público polos seus autores na rede.
