Lamentablemente, temos que lembrar o tema das bautizadas como “chemineas de Mariñamansa”. Nunha praza que en teoría é “zona verde” segundo o Plan Xeral de Ordenación Urbanística de Ourense, fixéronse dúas chemineas enormes contra as que Verdegaia xa protestou hai un tempo e contra as que os veciños veñen protestando desde que se comezou a falar de facelas. Estas chemineas ocupan esa chamada “zona verde”, pero que de verde ten pouco, xa que non hai practicamente vexetación, toda a praza está chea de baldosas e, por se fora pouco, ten dúas chemineas enormes no medio.

Sabiamos que esas chemineas estaban pensadas para expulsar os "malos fumes" dun supermercado da empresa Mercadona e un aparcamento soterrado. Por todo iso protestamos xa no pasado ó lado dos veciños da zona. Agora, en plena campaña electoral, temos que asistir ó bochornoso espectáculo de ver como ás agachadas os políticos queren dar esas licenzas non soamente dun xeito bastante "dubidoso" (remitímonos á información da nota de prensa que saíu en Ourense Dixital, La Región e Faro de Vigo o día 23 de maio de 2007 e á información que deu e está a dar a Cadea Ser desde ese día), senón cometendo varios atentados ecolóxicos e humanos.

En primeiro lugar, esas chemineas expulsarán unha contaminación que sae directamente á altura dun segundo andar dun edificio nunha zona que está pechada parcialmente polos propios edificios. Que alguén pense en saír ó seu balcón ou en pór a secar a roupa nel ou simplemente en abrir a porta do balcón con dúas chemineas botando a contaminación dos coches dun aparcadoiro subterráneo e de todos os negocios do supermercado.

Á parte da contaminación evidente que terían que respirar os veciños e as veciñas, está a contaminación acústica, xa que esas chemineas terán uns motores para expulsar esa contaminación, o que estará facendo ruído durante practicamente todo o día.

Por se fora pouco, tamén provocará vibracións que se notarán na zona onde VIVE XENTE.

E agora engadimos:

  • Aumento de tráfico para ir á superficie comercial.
  • Aumento de contaminación á parte das chemineas e os negocios.
  • Ninguén poderá gozar da "zona verde" xa que será imposible estar alí coa contaminación, coas vibracións e cos ruídos.
  • As posibles consecuencias para a saúde das persoas pola exposición continuada á vibración, á contaminación atmosférica e acústica.
  • Que esa "zona verde" se vai converter no "teito" dunha superficie comercial e dun aparcamento soterrado.
  • Que a legalidade das licenzas que se pretenden dar é moi dubidosa (e se non o é, porque se agachan tanto?).
  • Que soamente faltan catro días para as eleccións (a que tanta présa?).

E o mellor de todo o asunto é que non hai nin vai haber ningunha modificación no Plan Xeral de Ordenación Urbanística, é dicir, esa zona seguirá sendo "verde".

Por suposto, venderannos unha vez máis que aumenta a zona verde en Ourense (claro que as contas saen cando sabemos que contan a herba dunha rotonda como "zona verde").

Non é por pensar mal, de verdade, pero, sinceramente, cando hai moita merda (como a que van botar esa chemineas), CHEIRA!!