A crise continúa a reducir as emisións industriais causantes da mudanza climática

Segundo os datos divulgados na web da Consellería de Medio Ambiente,as emisións de dióxido de carbono (CO₂) dos sectores industriais aos que se lles aplica a Directiva de Comercio de Emisións reducíronse en Galicia nun 17,2% durante 2010 a respecto de 2009. A caída das emisións acumulada desde 2007 é practicamente do 50%. O recorte foi aínda maior no sector  eléctrico, que aínda así é responsable das dúas terceiras partes das emisións totais. A central térmica de carbón de ENDESA nas Pontes emitiu durante 2010 tanto CO₂ coma o resto das industrias galegas que participan no comercio europeo de emisións.

Os sectores industriais que participan no comercio de emisións emitiron 8.954.703 toneladas de CO₂ durante 2010, fronte ás 10.823.243 de 2009. As emisións destas industrias representan o 41% das emisións totais de gases de  invernadoiro causantes do cambio climático desde Galicia (en 2008, último ano para o que se dispón de información sobre as emisións totais).  Á espera dos datos oficiais, é previsible que as emisións totais –que inclúen, ademais das industriais, as dos demais sectores: transporte, doméstico, agrario,…- volvesen diminuír en 2009 e 2010, continuando o descenso iniciado en 2008 por causa sobre todo da crise económica.

A central térmica de carbón das Pontes continuou  a ser a maior fábrica de cambio climático de Galicia durante 2010. A pesar de seren as centrais eléctricas máis ineficientes e máis intensivas en emisións de CO₂, o principal gas de efecto invernadoiro, as térmicas de carbón das Pontes e de Meirama continúan a ter un papel importante no sistema eléctrico galego, achegando en conxunto un 20% da produción eléctrica no ano pasado. O carbón é o combustíbel fósil máis contaminante e aínda o máis empregado na xeración de electricidade en Galicia, malia que a súa participación continuou a decrecer en 2010. Entre 2007 e 2010  a xeración de electricidade sucia nas térmicas de carbón caeu perto dun 60% e durante o ano pasado foi superada tanto pola produción hidroeléctrica como pola eólica.

A crise económica, xunto coa perda de peso do carbón no “mix eléctrico”, explica a diminución das emisións de gases de invernadoiro rexistrada en Galicia durante os últimos anos. Este descenso ten que se consolidar e continuar. A crise debería ser unha oportunidade para iniciar a transición cara a unha economía baixa en carbono, sustentábel e xusta. Porén,  mentres a Xunta segue a atrasar o Plan de Loita contra o Cambio Climático, dá continuidade a políticas insustentables que favorecen o transporte por estrada coa construción ou ampliación de máis grandes infraestruturas, que defenden a produción eléctrica con carbón, ou que aumentan a incineración dos residuos urbanos.

Emisións de CO₂ (en toneladas) por sectores industriais en 2009 e 2010

Emisións de CO₂ (en toneladas)  das industrias do sector eléctrico en 2010