O xoves día 27 de Setembro é o día de acción global contra os Acordos de Asociación Económica (EPAs en inglés) que ten pensado asinar a UE con 79 países de África, Caribe e Pacífico (ACP). Estes "acordos" son Tratados de Libre Comercio, que liberalizarían totalmente o mercado dos países asinantes, obrigando a eliminar toda barreira comercial (aranceis) para as exportacións da UE e abrir de par en par o mercado destes países (empobrecidos a maioría) ás empresas transnacionais europeas, en cumprimento do principio de libre competencia e os dereitos de propiedade intelectual.
Uns tratados que fomentan a "libre competencia" entre países con poder económico tan desigual, son inxustos, e tirarían por terra todo intento de promover a integración rexional ou o comercio local, perpetuando todavía máis a desigualdade e a pobreza. A data límite para asinar estes tratados é o 31 de Decembro deste ano 2007.
Moitos países rexeitan asinar estes acordos económicos apostando máis polas politicas de integración rexional, pero a UE ten presa e forza a súa sinatura baixo ameazas tais como recortar a axuda ó desenvolvemento ou restablecer aranceis elevados que prexudiquen as exportacións dos países do ACP.
Esta estratexia, impulsada polo comisario europeo de comercio Peter Mandelson, baséase nos intereses das empresas transnacionais europeas, abríndolles novos mercados e novas oportunidades para investir, acceso aos recursos naturais e reservas enerxéticas … -co prezo da perda da soberanía alimentaria para os pobos, destrución do medio ambiente, desestruturación da sociedade con perda da súa autonomía.
Mobilízate. Acude o xoves 27 ás 20:30 á concentración diante do MARCO.
