Despois do nacemento da Cousateca en Ourense (un lugar onde se prestan todo tipo de obxectos: esquís, botas de esquís, lanchas inchables, libros, ferros de pasar, televisións, xogos…), naceu a rede Ourense Troca, da que forman parte Verdegaia, Amigos da Terra, Amarante, Anacos da Cidade e Sem Um Cam.
Este domingo (3 de maio) levarase a cabo o primeiro mercadiño de troco regular que esta rede decidiu pór en marcha e do que se encargará esencialmente Verdegaia.
Verdegaia vén facendo mercadiños de troco desde hai moito tempo, tanto a asociación soa (Ourense, Compostela, Ferrol) como con outras asociacións (Vigo Troca).
Alegrámonos de ter conseguido a unión de máis grupos que estaban xa interesadas nesta actividade, de xeito que a partir de agora, haberá un mercadiño de troco o primeiro domingo de mes cada dous meses na Praza Maior.
Polo momento, comezou a andar a Cousateca, establecemos este mercadiño de troco bimensual e intentaremos dinamizar o Saramaganta, que é unha listaxe de correo de información puntual de actividades de todo tipo de colectivos da cidade e da zona de Ourense.
Aínda que os mercadiños son bimensuais, decidimos que haberá este ano en maio, en xuño, en setembro e en novembro.
Sabemos que o mercadiño de troco serve non só para deixar unhas cousas e coller outras, evitando así o consumo de novos produtos e reducindo os residuos que xera botar os obxectos ao lixo, senón que é unha forma diferente de relacionarnos co mundo, de estar nel e de ser conscientes dos seus problemas, así como de decatarnos do que é realmente necesario.
Agardámoste o día 3 de maio na Praza Maior de Ourense, de 11:00 a 14:00.