Transcripción completa das grabacións

Como candidato á alcaldía, que previsións ten para a Praza Pública de Salgueiriños?

NESTOR REGO. BNG

20.03.07 - FORO CÍVICO DE ONDA CERO NO HOSTAL DOS REIS CATÓLICOS  (1m 47s)

Despois de que o BNG tivese apoiado [na votación do pleno] as alegacións dos veciños e veciñas que pedían que nesa ampla zona non se construísen vivendas senón que se mantivese a condición que tiña de praza pública, penso que vai ser un magnífico espazo de relación e de convivencia, con moitas posibilidades, tanto pola situación -nunha zona de crecemento da cidade cara ao norte- como pola propia dimensión.

Desde logo, se o BNG ten a alcaldía de Santiago, comprometémonos a que esa praza estea executada nun ano dende a toma de posesión. Coido que non é un proxecto excesivamente complexo, polo que nun ano se pode desenvolver, seguindo no fundamental as ideas de Gallego Jorreto, un dos mellores arquitectos que temos no noso país, e en todo caso sempre de acordo coas opinións dos veciños e veciñas desa zona.

Noutras hipóteses en que o BNG estea no goberno municipal, loxicamente dependerá da responsabilidade que teña cadaquén: se o BNG ten a concellaría de obras ou de urbanismo, loxicamente ese compromiso se debe manter.

Como candidato á alcaldía, que previsións ten para a Praza Pública de Salgueiriños?

GERARDO CONDE ROA. PP

27.03.07 - FORO CÍVICO DE ONDA CERO NO HOSTAL DOS REIS CATÓLICOS  (2m 12s)

O grupo Popular defendeu ben, ao meu xuízo e con todo o meu respaldo a necesidade desa praza pública, e eu non fago outra cousa máis que ratificar ese compromiso.

O que non ten sentido é o que xa se produciu noutros ámbitos de Santiago: e que as cousas que se aproban inicialmente nun plan xeral, ao final acaban cambiándose ao último momento, dunha maneira un tanto peculiar, e dan lugar a máis aproveitamento residencial. Estou pensando agora no convenio que hai firmado con Adif na estación de Renfe.

A construción dese espazo, é unha cuestión que haberá que afrontar, dependerá do orzamento municipal,  no senso de que poida ser só o concello de Santiago o que afronte esa construción, se se pode repercutir algo entre os que son -digamos- beneficiarios directos desa praza, e en todo caso se pode haber a achega doutra administración pública.

Pode ser un lugar emblemático de Santiago. Se se fai unha actuación bonita, se se convoca un bo concurso, se se fai un bo deseño, aquel é un sitio que pode quedar estupendamente ben, Por tanto, eso é o que a nós nos interesa, ir facendo pouco a pouco de espazos da cidade que inicialmente tiñan outra consideración diferente, espazos habitables e que teñan un contido especial que lle dean un carácter un pouco de barrio a esa zona.

Como candidato á alcaldía, que previsións ten para a Praza Pública de Salgueiriños?

XOSÉ SÁNCHEZ BUGALLO. PSOE

17.04.07 - RADIO GALICIA CADENA SER  (4m 19s)

Esa zona vaise transformar... [entra en detalles das obras que vai facer a Xunta na explanada onde se fai actualmente a feira do xoves]

Máis adiante eu espero que poidamos actuar. Facer unha actuación de mellora. Eu, o que non me podo comprometer agora mesmo é a realizar a actuación que sei que a vós vos gustaría máis, que era a que inicialmente se prevía, que non é un proxecto, no "borrador" que preparara Manuel Gallego, por que esa actuación custará moitos millóns de euros, e eu non teño garantido a día de hoxe aínda o financiamento.

De feito, na práctica, cando propoñiamos o das vivendas, era como un mecanismo para obter financiamento para toda esa operación. Como sabes moi ben, quedou desbotado no propio plan, e polo tanto as actuacións terán que ir paso a paso e segundo vaiamos tendo recursos.

Hai outra parte que queremos executar... [entra en detalles dos edificios de bombeiros e policía municipal], e no espazo que actualmente ocupa o aparcadoiro [o da praza pública], en canto teñamos recursos a nosa intención é atendelo, pero teremos que ir nun proceso máis "escalonado" que o que tiñamos previsto inicialmente.

O proxecto de Gallego Jorreto non existe, por que nunca houbo tal proxecto. Había uns debuxos que deron lugar a un plan especial, pero logo a realidade tampouco responde ao que eran eses debuxos. Para empezar el debuxaba un río nun sitio que non está. Por que o río non se sabía onde estaba, por que estaba completamente tapado polo antigo mercado de gando. Entón cando se fixo o edificio de Facenda descubriuse que o río en vez de ir ao outro lado do edificio ía por debaixo.

Loxicamente, cando poidamos actuar aí e levantar o parque, e recuperar a ribeira do río teremos que adaptarnos á realidade física existente. O río, Gallego Jorreto desviábao uns 40 m ou 50 me parece, non é que o desviara, que el o pintou por onde lle pareceu por que non o sabía. Terémonos que ir adaptando a esa realidade.