|
Verdegaia Ourense vén de enviar unha nota de prensa porque hoxe se prende o alumeado de Nadal na cidade, rodeado outra vez de polémica e outra vez coa opinión de Verdegaia en contra polo gasto innecesario de enerxía.
Este é o texto:
"Non sabemos moi ben por que existe esta obsesión de prender tantas luces
polo Nadal, mais semella que se non se fai non hai Nadal.
Verdegaia xa se ten manifestado en contra do gasto innecesario de
cantidades inxentes de enerxía para un alumeado que en realidade non é
necesario para nada.
En Ourense non soamente o Concello xa prende un alumeado que se paga con cartos públicos (sen
consultarlle á cidadanía se quere pagalo ou non), senón que ademais o Centro
Comercial Aberto Ourense Centro tamén se encarga de iluminarnos máis con outro
alumeado, por se non fora suficiente.
En anos anteriores, segundo unha noticia publicada no xornal La Voz de Galicia o día 9 de
decembro, o Concello pagaba o que xa instalaba máis o 30% do que colocaba o
Centro Comercial Aberto Ourense Centro. Este ano vai pagar o que coloca e o 50%
do outro.
É dicir, toda a cidadanía vai pagar un alumeado que coloca o Concello (do
que non sabemos o custo económico nin enerxético) e a metade doutro alumeado
que na teoría se coloca porque quere o empresariado do Centro Comercial Aberto
Ourense Centro (40.000 euros e o custo enerxético que descoñecemos).
Se todo isto é grave, o gasto innecesario de enerxía é o peor de todo.
En plena crise do petróleo e en pleno debate sobre o aforro enerxético,
cando chegan estas datas semella que esquecemos todo e hai que gastar o que non
se ten en quince días.
Ademais, as reiteradas protestas dos comerciantes por ter que pagar o
alumeado ocultan o verdadeiro motivo polo que o fan. Está demostrado que o
alumeado e a música incitan ao consumo e este é o verdadeiro motivo polo que o
Centro Comercial Aberto Ourense Centro instala todos os anos o alumeado. Isto
quere dicir que o gasto que fai en realidade se vai traducir en beneficio para
os seus comercios.
Polo tanto, os desexos de Verdegaia para este Nadal son:
- Que o Concello
dea conta do gasto total económico e enerxético do alumeado.
- Que o Concello
de Ourense como Administración dea exemplo das políticas medioambientais que
din que levan a cabo sendo o primeiro que aposte por un verdadeiro aforro
enerxético, eliminando a colocación deste alumeado.
- Que se eviten en
xeral este tipo de accións para incitar o aumento do consumo."
|
Verdegaia - Ourense 
