 Eric Holt-Giménez, director executivo de Food First (Instituto para a Política Alimentar e de Desenvolvimento) estará en Galiza coa ISAP
(Iniciativa pola Soberanía Alimentar dos Pobos) para falar sobre a
“Crise alimentar global. Causas e situación. A alternativa da soberanía
alimentar”. Será os vindeiros 25 e 26 de Novembro en Lugo, Santiago de
Compostela e A Coruña.
Aínda que nestes momentos non se fala máis que dunha crise, a
financeira, existen outras graves crises globais: ambiental,
enerxética, alimentar… e están todas relacionadas. Hai apenas uns meses
a crise dos prezos dos alimentos centrou a atención dos medios de
comunicación durante unhas semanas, aínda que xa non se fale dela non
desapareceu.
O recoñecido especialista internacional Eric Holt-Giménez estará en
Galiza, da mao da ISAP, para falar da crise alimentar global e dar a
coñecer as causas desta e a situación actual, ademais de avaliar a
alternativa da soberanía alimentar dos pobos.
Axenda:
- Martes 25 de Novembro
- 20:00 horas: Palestra. Galería Sargadelos (Lugo)
- Mércores 26 de Novembro
- 11:00 horas: Conferencia de prensa. Clube Internacional de Prensa (Compostela)
- 12:00 horas: Palestra. Salón de Graus da Faculdade de Ciencias Políticas-USC
- 20:00 horas: Palestra no Kiosko Alfonso (A Coruña)
Eric Holt Giménez -director executivo de Food First
desde 2006- é Doutor en Estudos Ambientais (Universidade de California)
e Máster en Desenvolvimento Agrícola Internacional. Ten unha longa
experiencia de traballo con campesiñado de Latinoamérica, África e
Estados Unidos, así como de investigación sobre vulnerabilidade
ambiental, agricultura sustentábel e agroecoloxía. O seu último libro é
Campesino a Campesino: Voices from Latin America’s Farmer to Farmer
Movement for Sustainable Agriculture (2006).
Food First/Institute for Food and Development Policy
é un dos máis recoñecidos “think tanks” sobre alimentación dos EUA,
segundo o New York Times. A mision de Food First é pór fin ás
inxustizas que causan fame, pobreza e degradación ambiental por todo o
mundo. Food First cré que un mundo libre de fame é posíbel se o
campesiñado e as comunidades retoman o control dos sistemas alimentares
actualmente dominados polas transnacionais da agroindustria.
A ISAP (Iniciativa pola Soberanía Alimentar dos Pobos) é unha alianza nacida en Abril de 2008 seguindo o mandado do Foro de Nyéléni
celebrado en Sélingué, Mali, en Febreiro de 2007. A ISAP ten como
obxectivo dar a coñecer, construir e defender a soberanía alimentar dos
pobos en e desde Galiza. Actualmente está integrada por Amarante, A
Cova da Terra, Eirado, Emaús, Semente, Sindicato Labrego Galego,
Verdegaia e Veterinarios Sen Fronteiras.
|
Paz e Globalización 
