|
 Os colectivos Ecoloxistas en Acción e Verdegaia, e mais as redes A Ría Non se Vende e Galicia Non Se Vende, informaron onte en Vigo do outorgamento dun total de 26 bandeiras negras no
litoral galego, co obxectivo de faceren visibles os principais problemas
de destrución destas zonas. Tamén fixaron 8 puntos negros en lugares
onde os problemas que provocan a destrución destes enclaves naturais
"aínda non callaron de todo".
Así o afirmaron hoxe o coordinador da campaña de Bandeiras Negras
da confederación estatal Ecoloxistas en Acción, Jorge Sáez, e o portavoz de Galicia Non Se Vende, Enrique Romasanta, nunha rolda de prensa previa a unha
travesía pola ría de Vigo, a máis danada das galegas, e na que
colocaron algunhas destas bandeiras.
Así, os ecoloxistas explicaron que, das 26 bandeiras negras que
existen na comunidade, 16 delas están nas costas bañadas pola ría
viguesa, onde tamén se localizan os puntos negros da depuradora do
Lagares, na parroquia de Coruxo, así como o porto deportivo proxectado
na de Canido, ambas na cidade olívica.
Canto ao resto de bandeiras, 8 están na provincia da Coruña,
onde tamén se detectaron 5 puntos negros, e outras dúas en Lugo, que
ademais ten un punto negro.
Jorge Sáez explicou que a costa galega sufriu nos últimos anos un
gran desenvolvemento que está comezando a provocar efectos prexudiciais
non só aos ecosistemas, senón tamén ás actividades económicas
vinculadas ao sector primario, polo que a campaña deste ano denomínase
'Hipotecas costeiras'.
En todo caso, precisou que a situación "non é tan tráxica" como en
Levante, onde, segundo lamentou, o litoral está "totalmente
desconfigurado" por mor da presión urbanística. Aínda así, advertiu do
que considerou unha "privatización do litoral" e criticou o Plan
Acuícola da Xunta ao consideralo "incompatible" coa actividade
pesqueira.
Ría de Vigo
Canto ás principais ameazas ambientais que, segundo Ecoloxistas
en Acción, Verdegaia, A Ría Non se Vende e Galicia Non Se Vende, pesan sobre a Ría de Vigo figura a
creación de portos deportivos, as ampliacións portuarias así como o
"deficitario" funcionamento das depuradoras e as verteduras industriais.
Ademais, o representante de A Ría Non se Vende, Duarte Ferrín,
explicou os principais problemas ambientais da bahía, entre os que
destacou os proxectos de ampliación da Autoridade Portuaria de Vigo no
peirao de transatlánticos, na terminal de Bouzas, Chapela e Teis.
De igual modo, Ferrín, que é representante dun dos colectivos
integrantes da plataforma Galicia Non Se Vende, criticou o proxecto de
ordenamento da zona central portuaria, denominado Proxecto Nouvel, aínda
que tamén se referiu ao mal funcionamento das depuradoras de Coruxo
(Vigo) ou Moaña.
Tamén denunciou a situación "ilegal" do porto deportivo de Punta
Lagoa na Guía e o previsto nas antigas insotalacións da Escola de
Transmisións Técnicas da Armada (ETEA), no barrio de Teis.
Finalmente, criticou os proxectos da urbanización de Massó e o
porto deportivo de Cangas, así como as previsións do Plan Xeral de
Ordenamento Municipal (PXOM) de Moaña e de Vigo.
Máis información:
Video sobre a presentación do Informe
Campaña Galicia e Cantábrico "En acción polo mar"
Informe "Banderas negras 2008"
|
Urbanismo e territorio 
