O Lugar de Interese Comunitario (LIC) “Complexo Húmido de Corrubedo”, incluído na Rede Natura, abrangue dende o Castro de Baroña (Porto do Son) ate a Illa de Sálvora (Ribeira). Dentro deste LIC está un dos seis Parques Naturais galegos, o Complexo dunar de Corrubedo e lagoas de Carrexal e Vixán. En total son perto de 10.000 ha., agás 480 ha dende Punta Corgo ate Punta do Cantón, situadas prácticamente no centro do LIC.

Só así se entende esta incongruencia na definición dun espazo natural. A Punta do Corgo ten as mesmas cualidades ambientais que o resto do LIC pero ficou sen ningunha figura de protección na tramitación realizada pola anterior administración. Agora sabemos porqué: Unha vez máis un espazo protexido vese ameazado pola implantación dunha macropiscifactoría

As piscifactorías teñen un un importante impacto ambiental sobre o seu entorno, maior canto máis grande. Este impacto ambiental afecta á ocupación do territorio cun importante impacto paisaxístico e de afección directa ao litoral, unha elevada contaminación coa liberación de efluentes con alto contido en materia orgánica, patóxenos de peixes e substancias fitosanitarias como os antibióticos e a liberación involuntaria de individuos ao medio natural, que poden introducir enfermedades.

Neste caso o impacto é tanto máis importante cuanto a ubicación da piscifactoría estaría no medio do LIC e á beira de ecosistemas extraordinariamente fraxiles como son esteiros, complexos dunares e lagoas costeiras.

Verdegaia demanda á Xunta que paralice a tramitación de todas os proxectos de piscifactorías até que non se aprobe a revisión do Plano Sectorial de Parques de Tecnoloxía Alimentaria, e que elabore planos que garantan a conservació dos espazos da Rede Natura 2000 e ao mesmo tempo favorezan o desenvolvemento sustentábel nesas áreas, promovendo a calidade de vida das poboacións afectadas.

As macropiscifactorías non son a solución para os problemas da pesca nin de emprego na costa. Fomentan a pesca masiva de especies de pouco valor comercial (pero alto valor ecolóxico no complexo ecosistema marítimo) para fornecer de fariñas de peixe ás piscifactorías e destrúen emprego na pesca artesanal sen substituilo por outros postos de traballo.

Cómpre apostar pola recuperación dos caladoiros, o apoio á pesca artesanal sustentábel e a redución do sobreconsumo de peixe nos países máis desenvolvidos. A acuicultura pode ser un complemento pero sempre en instalacións pequenas, respectuosas co medio natural e baseadas en parámetros semellantes aos da agricultura e gandeiría ecolóxicas.