A dirixente labrega Gilda Roa, coa colaboración da Iniciativa pola Soberanía Alimentar dos Pobos (alianza integrada por Amarante, Sindicato Labrego Galego, Verdegaia e Veterinarios Sen Fronteiras), estará en Galiza do 4 ao 6 de Xuño informando sobre os impactos ambientais e sociais dos monocultivos de soia transxénica no Paraguai, que teñen como destino a exportación para a elaboración de agrocombustíbeis e pensos para gandaría industrial. Gilda Roa estará acompañada pola investigadora Nina Holland e a antropóloga An Maeyens. 

A ISAP (Iniciativa pola Soberanía Alimentar dos Pobos) organiza a visita a Galiza da dirixente labrega paraguaia Gilda Roa (MAP), acompañada da investigadora Nina Holland (CEO) e a antropóloga An Maeyens (A SEED Europe), dentro da xira europea "A soia mata".

Os monocultivos de soia transxénica teñen relación directa con fenómenos como a crise alimentar global e polémicas como a relacionada coa produción de agrocombustíbeis, que se atopan nestes momentos no centro da actualidade.

Gilda Roa, dirixente do MAP (Movimiento Agrario y Popular) viaxou a Europa para participar no evento Planet Diversity, en Bonn, paralelo á Convención da ONU sobre Diversidade Biolóxica, convidada por CEO (Corporate Europe Observatory) e A SEED Europe (Action for Solidarity, Environment, Equality and Diversity). A visita de Gilda Roa foi aproveitada por estas dúas organizacións para facer unha xira europea da campaña internacional "A soia mata".

Calendario da xira en Galiza:

• Mércores 4 de Xuño

   - 20:00 horas. Charla. Sala de Xuntas da Faculdade de Veterinaria (Lugo)

• Xoves 5 de Xuño

   - 10:30 horas. Almorzo coa prensa. CIP (Avenida da Coruña 6, Baixo), Compostela

   - 19:15 horas. Charla. Ateneo Ferrolán (Rúa Magdalena 202-204 1º), Ferrol

Venres 6 de Xuño o 20:00 horas. Charla. CSA A Cova dos Ratos (Rúa Romil 3 Baixo), Vigo

As charlas serán acompañadas de proxeccións de curtametraxes nas que se recolle a situación que vive o rural paraguaio.

Gilda Roa fai parte da Dirección Nacional do MAP (Movimiento Agrario y Popular), organización paraguaia que traballa na defensa das comunidades labregas que moran na fronteira agrícola da soia transxénica.

Nina Holland é investigadora do CEO (Corporate Europe Observatory), organización con base en Amsterdam dedicada á investigación e realización de campañas sobre as ameazas á democracia, equidade, xustiza social e ambiente por parte das empresas e os seus lobbies. Un dos ámbitos de investigación de Nina Holland é o da política europea sobre agrocombustíbeis.

An Maeyens é antropóloga e membro da rede A SEED Europe (Action for Solidarity, Environment, Equality and Diversity) con sede en Amsterdam. An Maeyens ten estudado a situación das poboacións labregas paraguaias.