A asociación ecoloxista Verdegaia vén de denunciar ante a Delegación provincial de Pontevedra da Consellaría de Medio Ambiente e Desenvolvemento Sostible o verquido ilegal de perto de cen camións cargados con entullo -que provén das obras que se están a realizar para a construcción da vía do AVE- no Monte da Caritaina, lugar do Rañadoiro, na parroquia pontevedresa de Pontesampaio. 

Así mesmo, Verdegaia solicita que non se legalice este verquido, que se reestableza o estado natural do lugar onde se realizaron as verqueduras e que se persega aos autores desta ilegalidade.