|
Verdegaia solicitou ás Consellerías de Medio
Ambiente e de Industria que non permitan a construción do parque eólico Pena
Redonda, por se situar na Serra do Eixe,
que forma parte do macizo de Pena Trevinca. A construción dun parque
eólico nunha zona que debería formar parte do futuro Parque Natural de Pena
Trevinca, no sureste da provincia de Ourense, é ambientalmente inaceptable.
Esta ameaza para a conservación dunha das principais áreas de montaña da
Península pon de manifesto tanto a debilidade da política autonómica de
conservación da natureza como as carencias ambientais da política eólica.
A Serra do Eixe é de grande importancia para a
conservación de diversas especies ameazadas, moi especialmente para a águia
real (Aquila chrysaetos), ave en perigo de extinción en Galicia.
Estímase que na Serra do Eixe nidificarían 3 ou 4 das como moito 10 parellas de
águia real que o farían en Galicia e áreas próximas. O propio estudo de impacto
ambiental presentado pola empresa promotora do parque, Hidroeléctrica Galaico
Portuguesa, S.A, recoñece implicitamente o perigo inasumible que representaría
o parque eólico para a sobrevivencia da águia real, ao afirmar que podería
morrer cada ano por colisión cos aeroxeradores un individuo desta especie.
A conservación das
fermosas paisaxes e da rica fauna e flora do macizo de Pena Trevinca resulta
claramente incompatible coa construción do parque eólico Pena Redonda que,
ademais da instalación de 7 grandes aeroxeradores, conlevaría a apertura de
varios quilómetros de novas pistas e a construción dunha subestación
transformadora e de tendidos eléctricos para evacuar a electricidade xerada.
A ameaza ambiental
que representa o parque eólico Pena Redonda é un sinal de alerta sobre a
necesidade de ampliar canto antes a Rede Natura 2000 e de non atrasar máis a
creación do Parque Natural de Pena Trevinca, compromisos asumidos pola
Consellería de Medio Ambiente e Desenvolvemento Sostible para esta lexislatura
e aínda pendentes. O novo Parque Natural debería evitar que proxectos como este
nin tan sequera cheguen a se tramitar, promovendo a conservación da natureza e
a mellora das condicións de vida da xente que aínda vive nesta zona de montaña.
Desde o ano 2002, non se declarou ningún parque natural no noso país.
O parque eólico Pena Redonda foi admitido a trámite pola
Consellería de Innovación e Industria ao abeiro da convocatoria de potencia
eólica do ano 2006, o mesmo que o que afecta á serra da Groba (Val Miñor),
outro espazo de elevado valor ambiental. O novo decreto que regula a enerxía
eólica, aprobado polo Consello da Xunta en decembro pasado, permitiría novamente
a súa tramitación, xa que tan só exclúe as zonas que forman parte da Rede
Natura 2000, mais non outras áreas de alto valor ecolóxico. O cal evidencia que
o novo decreto eólico non garante a conservación da biodiversidade e o respecto
á paisaxe.
Máis información:
O novo decreto autonómico de aproveitamento da enerxía eólica non garante o respecto da natureza
|
Biodiversidade 
