Verdegaia-Vigo organizará a súa segunda proxección do documentario “O salario do silencio” o vindeiro venres día 8 ás 20:30 h. na Asociación Cultural Caleidoskopio (rúa Romil, nº3-baixo). Ao rematar o filme realizarase un coloquio onde intervirán os autores do mesmo, Mabel Rivera e Enrique Banet. 

O filme amosa como a cobiza e a falta de escrúpulos levaron a instalar a planta regasificadora de REGANOSA en Mugardos, no interior da ría de Ferrol, provocando un elevado impacto ambiental e ameazando a saúde e a seguridade da poboación que vive no contorno da ría.

"O salario do silencio" quere axudar a romper o silencio que sempre rodeou a esta instalación, á que se opón, na súa ubicación actual, grande parte das xentes da ría ferrolá desde o ano 2001. O documental contou coa colaboración das asociacións e colectivos veciñais, profesionais, ecoloxistas, xurídicos, culturais, corpos de seguridade, sanitarios, etc, etc, que integran o Comité Cidadán de Emerxencia para a ría de Ferrol. Pola contra, os responsables directos do proxecto, tanto os directivos da planta como certos cargos públicos, non quixeron colaborar.

A planta de REGANOSA, empresa participada por Endesa, Unión Fenosa, Grupo Tojeiro, Xunta de Galicia, Caixa Galicia, Sonatrach, Banco Pastor e CaixaNova, foi construída coa finalidade principal de garantir o abastecemento das centrais térmicas de ciclo combinado a gas natural de Arteixo (Unión Fenosa) e As Pontes (Endesa), que entrarán proximamente en funcionamento. Estas centrais térmicas non substituirán ás de carbón das Pontes (Endesa) e de Meirama (Unión Fenosa), pois éstas seguirán a funcionar, só con carbón de importación a partir de 2008. REGANOSA devolve o gas natural licuado que chega en barcos á súa planta ao estado gasoso, para o distribuír despois a través dun gasoduto.

Só a cobiza empresarial e un amplo apoio institucional, partidario e mediático, capaces até agora de burlar normas legais e de superar unha forte oposición cidadá, explican a instalación da única planta regasificadora de Galicia nun lugar tan perigoso, nun dos peores emprazamentos posibles. Nos anos 90, un estudo contratado pola empresa ENAGAS considerou como o mellor emprazamento o exterior da ría de Ferrol, onde se acabou construíndo un impactante porto exterior, logo de ser excluído o tramo de costa afectado da proposta da Rede Natura 2000.

No documental, Manuel Amorim, profesor da Universidade da Coruña, chama a atención sobre a irracionalidade que representa o feito de que vaia haber tantas plantas regasificadoras en España (por exemplo, haberá outra ben perto de Ferrol, en Xixón). A xuízo de Verdegaia, tamén é preciso cuestionar unhas políticas enerxéticas que fan pouco por promover o aforro e a eficiencia, apenas desincentivan a queima de carbón -que supón hoxe a metade da xeración eléctrica galega- e non apostan con forza por todas as enerxías renovables.

Namche Films

"O salario do silencio" é a primeira produción de Namche Films, unha nova produtora especializada en documentais sobre cuestións ambientais que xa está a preparar o seu segundo filme, que tratará do impacto das canteiras de lousa na serra do Courel. Enrique Banet foi o responsable da dirección, guión, cámara e edición, mentres que a actriz Mabel Rivera ocupouse da documentación, produción executiva e voz en off. Os dous participaron nun animado coloquio que tivo lugar logo da proxección organizada por Verdegaia.

Os beneficios obtidos coa venda do filme en DVD irán destinados á Confraría de Mariscadores da Ría de Ferrol.