|
Verdegaia sumouse á campaña “Deamos o primeiro paso, entidades galegas pola redución de residuos”, cuxo obxectivo é a creación dunha rede de entidades que difundan prácticas e iniciativas a prol da redución do lixo, tanto no seu funcionamento interno como no seu ámbito de actuación. A Federación Ecoloxista Galega (FEG), da que forma Verdegaia, é unha das principais impulsoras desta acción.
No lanzamento da campaña, a FEG sinalou que, dado o preocupante aumento na produción de lixo na nosa terra (case un 24% no período 1998-2003) e a inexistencia de medidas para atallar estes incrementos por parte da administración galega, son os colectivos sociais os que queren promover a redución en orixe e reclamar o dereito a un consumo que produza menos residuos. Desde hai décadas, desde o movemento ecoloxista vense promovendo, no eido dos residuos, a estratexia dos 3R (reducir, reutilizar e reciclar), mais o sistema económico e a administración só ten promocionado, e de forma insuficiente, o último R, a reciclaxe. Deste xeito, os investimentos en prevención e reutilización do lixo no último Plan de Xestión dos Residuos de Galicia (o do período 1998-2003), foron de apenas o 1% do orzamento. Sendo a reciclaxe o único R que ten recebido apoio, os resultados da xestión do lixo en Galicia seguen a ser moi pobres, xa que no ano 2003 (segundo datos da Xunta) a compostaxe e a reciclaxe de envases apenas sumaron o 7% do total, en canto un 29% foi depositado en vertedoiros e un 64% do lixo foi incinerado e convertido en cinzas e escouras tóxicas destinadas a un vertedoiro de seguridade. Verdegaia, a FEG e o resto das organizacións promotoras desta acción a prol da redución agardan que o novo Plan de Xestión de Residuos de Galicia que vai impulsar o Goberno bipartito conte coa participación de todos os sectores implicados no mundo dos residuos e promova realmente os 3R. Cartel Deamos o primeiro paso.pdf Blog da campaña |
Resíduos e contaminación 
