A Sociedade Galega de Historia Natural e Verdegaia denuncian que durante a tarde do domingo 13 de xuño o Parque Natural das Fragas do Eume foi utilizado para facer probas cun coche de rallies contando co permiso do Concello da Capela e sen ter informado nin solicitado autorización á dirección do Parque Natural. Ambas asociacións consideran que se trata dunha agresión á fauna e á flora xa que estamos a falar dun entorno sensible que se pode ver afectado pola afluencia masiva de público ou impactos xerados pola circulación dos vehículos, causando ruídos e posibles vertidos contaminantes, atropelos de fauna, etc.
Así mesmo, responsabilízase ao Concello da Capela por favorecer usos non
tradicionais, de elevado impacto no Parque Natural e cun interese nidiamente privado, en detrimento dos visitantes que non pudieron
empregar a estrada pública.
Dende
as 17 ata as 21:00 horas do pasado domingo 13 de xuño, a estrada que
comunica As Neves coa Central Eléctrica do Eume, no Concello de A
Capela, e dentro do Parque Natural Fragas do Eume, foi empregada como
pista de probas para vehículos de rallie. Non só se cortou o paso
neste vial, senón tamén nun dos sendeiros que dá acceso ao
Mosteiro de Caaveiro e tamén o acceso cara a Monfero.
Sorprendentemente, as instalacións da Central Eléctrica do Eume na
Ventureira serviron a modo de taller improvisado de vehículos, se
ben este recinto de ENDESA permanece sempre pechado e non pode ser
visitado por ningunha das persoas que percorren habitualmente o
Parque Natural.
 Membros
da SGHN e Verdegaia, xunto con outros visitantes, foron apercibidos
polos organizadores para que non empregasen a estrada. Os
organizadores entenderon suficiente a autorización do Concello de A
Capela e continuaron ata o final da tarde coas probas a pesar de
personarse no lugar unha patrulla do SEPRONA.
As
dúas asociacións instan aos alcaldes cuxos concellos están
incluídos no Parque Natural para que non autoricen probas de
vehículos a motor ou calquera outro tipo de actividades que vulneren
os valores polos que se lles concedeu a figura de protección. ás Fragas do Eume.
Lembran á Consellería do Medio Rural a urxencia na aprobación
do Plan Reitor de Usos e Xestión do Parque Natural, unha ferramenta
que Verdegaia e SGHN consideran imprescindible para impedir este tipo
de aberracións no futuro e posibilitar a axeitada xestión do mesmo.
Finalmente,
Verdegaia e SGHN consideran que este atentado ambiental non se pode
considerar como un feito illado, senón que se debe incluír dentro
dunha auténtica avalancha de agresións ambientais protagonizadas
por afeccionados a diversos tipos de vehículos motorizados tales
como motos de auga, quads, motos de cross e enduro, vehículos 4x4 e,
neste caso, coches de rallies. Ditas agresións ademais, como
puidemos observar o domingo pasado e como se constatou recentemente
na Ría de Betanzos, non respectan as zonas protexidas pola Rede
Natura 2000 ou como Parque Natural.
|
