O día 23 de setembro Verdegaia Ourense celebrou a comparativa de medios por segundo ano consecutivo, despois do día "sen coches" e na Semana Europea da Mobilidade. Os resultados serviron para dinamizar a masa crítica do 25 de setembro, que a partir de agora incorporará unha actividade da que se encargará de cada vez unha asociación ou colectivo da Masa crítica (o mes que vén tócalle a Amigas da Terra e o seguinte a Amarante).

Verdegaia e a Asociación VAL (Voluntariado Ambiental da Louriña) colocarán un posto informativo na Praza do Concello do Porriño o vindeiro sábado 27 a partir das seis da tarde para divulgar os interesantísimos valores naturais e a enorme cantidade de desfeitas que padece o espazo natural das Ribeiras do Louro.

Este sábado 27, Vigotroca organiza un novo mercadiño de troco e cesión na rúa Urzáiz, fronte ó mercado do Calvario, entre as 12:00 e as 14:00 h mentres que Verdegaia-Compostela celebra outro de 11:30 a 13:00 na Praza de Mazarelos. Os mercadiños de troco están abertos a vosa participación: calquera obxecto que teñades na casa, roupa, libros, discos, mobles, electrodomésticos, etc., teñen o seu sitio no mercadiño. Se tedes a casa ateigada de cousas que non utilizades, ou se precisades dalgo e non queredes gastarvos os cartos, contade co troco: unha ocasión de primeira para reutilizar os obxectos e darlle unha vida máis ecolóxica e sustentable as nosas cousas. Por unha economía alternativa e un consumo consciente e responsable, por un planeta libre de bancos depredadores e neoliberalismos rapaces: súmate ao troco e á cesión, súmate ao sentido común. Usa o que precises e comparte o que tes!

Como todos os derradeiros xoves de mes, o 25 de setembro terá lugar unha nova edición da Masa crítica en Ourense. Desta vez queda encadrada na Semana europea da mobilidade, o que nos dá pé para darlle aínda máis sentido, se cabe, á reivindicación do uso da bicicleta dentro da cidade como medio de transporte máis rápido e sustentable tanto ambiental como socialmente.