Verdegaia entende que a xeralidade dos Concellos galegos non está a asumir a súa parte de responsabilidade na redución das emisións que provocan o cambio climático. Os Concellos deberían integrar a loita contra o cambio climático nas súas políticas, o que incidiría positivamente na prevención do maior problema ambiental global e na mellora da calidade de vida da cidadanía. Verdegaia demanda que, cando menos as principais cidades, apliquen estratexias municipais de loita contra o cambio climático.

Segundo os datos para Galicia do Inventario de Emisións do Ministerio de Medio Ambiente (MMA), as emisións de gases causantes do cambio climático do transporte por estrada medraron o 81 % entre 1990 –ano base do Protocolo de Quioto- e 2004. A estrada supón a maior parte das emisións do sector do transporte, responsable no seu conxunto do 18 % da contribución galega ao cambio climático. Verdegaia propón iniciar unha reconversión ecolóxica do transporte.

Verdegaia demanda á Xunta que adapte a súa política enerxética á loita contra o cambio climático. Para iso, debe apostar con forza polo aforro e a eficiencia enerxética, deixar de apoiar as centrais térmicas de carbón e promover máis as enerxías renovables, especialmente nas súas aplicacións máis descentralizadas. Unha nova estratexia enerxética debería ser o eixo central do Plano Galego de Redución de Emisións de Gases de Efecto Invernadoiro (GEI).

Segundo os datos facilitados a Verdegaia polo Ministerio de Medio Ambiente, o 83% das emisións galegas de gases causantes do cambio climático rexistradas en 2004 –último ano para o que hai datos oficiais dispoñibles, que se divulgan aquí por primeira vez- foron debidas á produción, transformación e consumo de enerxía. As centrais térmicas representaron nada menos que o 42% da contribución galega ao  cambio climático.

O cambio climático xa está aquí. Cada vez son máis as evidencias. Por exemplo, a temperatura media entre 1973 e 2004 aumentou 1,42 ºC en Galicia. “10 chiscos ao Clima” é unha acción de Ecologistas en Acción que ofrece uns consellos moi sinxelos para nos comprometermos como consumidoras e consumidores na urxente loita contra o cambio climático. Estamos a tempo de evitar un cambio climático catastrófico. A túa contribución é importante e necesaria.