Concentración antinuclear, en apoio ao pobo xaponés, Vigo 17/03/2011

En máis de 30 cidades españolas, Ecoloxistas en Acción convocou para hoxe xoves, 17 de marzo, ás 19h, actos en solidaridade con pobo xaponés e de rexeitamento á enerxía nuclear. A esta convocatoria fóronse sumando diversos colectivos entre os que se encontra Verdegaia. En Fukushima Daichii produciuse o segundo accidente máis grave da historia nuclear mundial, tras o de Chernobil. A situación actual é crítica, dada a fuga radiactiva xa detectada a centos de quilómetros da central de Fukushima. Estes sucesos poñen de manifesto o risco no emprego da enerxía nuclear e aconsellan abandonarmos esta fonte de enerxía. As centrais españolas non están exentas de problemas e supoñen un risco inadmisible. O máis sensato é proceder ao peche escalonado, co obxectivo de prescindir da enerxía nuclear no horizonte de 2020. Por todo isto, e en solidariedade coas víctimas do terremoto, acude ás concentracións.

En Vigo, ante o MARCO, na rúa Principe.

En Ferrol, ante o Edificio Administrativo da Xunta de Galicia (Praza de España).

Dos seis reactores en activo da central de Fukushima-Daiichi (Xapón), o número un, o máis antigo, foi o máis afectado e o primeiro en sufrir a fusión do núcleo. Este reactor BWR de 460 MW de potencia é idéntico ao reactor da central nuclear de Santa María de Garoña, en Burgos, tanto na súa construción interna coma no seu edificio de contención. De feito construíronse ao mesmo tempo e inauguráronse con meses de diferenza.

Ao xuízo de Ecoloxistas en Acción, Greenpeace, WWF España e CCOO, algunhas das iniciativas do Goberno estatal para diminuír o consumo enerxético, como a redución de velocidade en autovía a 110 km/h, son acertadas, pero carentes da ambición e continuidade necesarias. Por este motivo, as devanditas organizacións lembran ao Goberno as tres proposicións de lei que xa presentaron sobre mobilidade sustentable, fiscalidade ambiental, e aforro e eficiencia enerxética, que permitirían lograr un maior aforro enerxético.

A Cámara Alta aprobou, dentro da Lei de Economía Sustentable, que as centrais nucleares funcionen máis alá dos 40 anos, o tempo para o que foron deseñadas. A proposta, de CIU e PNV, foi apoiada por PP e PSOE, partido político, este último, que renuncia así a fixar un calendario de peche incumprindo de xeito determinante as súas promesas electorais.

Ecoloxistas en Acción vén de presentar a súa proposta de xeración eléctrica para 2020 que formula unha redución do 26% do consumo eléctrico, do 45% de emisións e inclúe o peche das centrais de carbón, fuel e nucleares para 2020. O 72% da electricidade sería de fontes renovables. Segundo a organización ecoloxista, trátase dunha proposta tecnicamente detallada e, polo tanto, realista e necesaria. Inclúe unha análise dos impactos que virían como consecuencia da instalación de tanta potencia renovable e o tendido eléctrico conseguinte.