Aínda que paralelamente presentou un documento moito máis elaborado, a Xunta vén de comezar o procedemento de Avaliación Ambiental Estratéxica (AAE) sometendo a consulta pública un pequeno documento de inicio do Plano Galego de Acción fronte ao Cambio Climático. Aínda que o documento de inicio non define obxectivos de redución de emisións, polo que xa se coñece publicamente, a Xunta renuncia a diminuír as emisións de GEI no período 2008-2012 a respecto da situación actual. Verdegaia tamén está a participar na AAE de dous planos moi relacionados coa loita contra a mudanza climática: o Plano Enerxético e o Plano Eólico.

Verdegaia denuncia que as centrais térmicas de carbón das Pontes e de Meirama emitiron en 2007 tanto dióxido de carbono (CO₂) como 660.156 familias españolas con hábitos enerxéticos insustentables. En 2008, a ONU dedica o Día do Ambiente (5 de xuño), a chamar a atención sobre a necesidade dunha economía baixa en carbono. En Galicia, iso pasa hoxe sobre todo por reducir drasticamente a produción eléctrica con carbón. Porén, a Xunta segue sen facer nada neste senso.

Verdegaia enviou unha caixa con carbón ao presidente da Xunta,  e outra ao Vicepresidente, para lles transmitir o seu descontentamento por a Xunta non ter presentado aínda un Plano Galego para a Redución das Emisións de Gases de Efecto Invernadoiro (GEI), incumprindo así os seus propios compromisos. Deste xeito, Verdegaia tamén protesta polo apoio da Xunta ás centrais térmicas de carbón, que en 2006 representaron  o 37% das emisións totais de GEI. A Xunta non se está a tomar en serio o problema das alteracións climáticas.

Verdegaia asinou unha declaración internacional contra a Captura e Almacenamento de Carbono (CAC) e a favor das renovables e da eficiencia enerxética. A proposta de Greenpeace, máis de 100 organizacións sociais apoiaron esta declaración, entre as que tamén se atopan a Federación Ecoloxista Galega (FEG) e Ecologistas en Acción. A CAC chegaría tarde para evitar unha mudanza climática catastrófica e resulta unha excusa para construír novas centrais térmicas de carbón, o combustible fósil máis contaminante.