A Coalición Clima demanda que todos os partidos políticos inclúan como prioridade nos seus programas para as vindeiras eleccións xerais a aprobación dunha Lei de Cambio Climático. A falta de compromiso político e a presión de poderosos sectores económicos están a atrasar a resposta a unha urxente ameaza no século XXI. Cómpre un impulso lexislativo que dea un sinal claro sobre o camiño a seguir. A primeira obriga de calquera goberno é protexer a seguridade e o benestar da súa cidadanía, incluídas as xeracións futuras. Esíxeo agora! .

Para Ecoloxistas en Acción, a avaliación preliminar do CSN dos resultados das probas de resistencia das centrais nucleares españolas non bota sorpresas e peca unha vez máis de falta de esixencia, como xa o fixeron as probas en si mesmas. Entre estas non se contemplan accións humanas externas como iniciadoras do accidente e ignórase a acción de varios sucesos simultáneos. No informe o CSN reclama a instalación dalgúns sistemas novos para evitar o venteo de substancias radiactivas.

Verdegaia vén de presentar alegacións contrarias ao proxecto de explotación hidroeléctrica de Santa Cristina promovido por Iberdrola, pois entende que causaríalle danos ambientais inasumibles a un dos espazos naturais de maior interese da Península Ibérica. Con este proxecto, Iberdrola pretende tirar maior proveito da súa xa abusiva explotación do Sil, contribuíndo ao tempo a tentar compatibilizar dúas fontes de produción cada vez máis en conflito e nas que ten fortes intereses: a eólica, non almacenable, e a nuclear, inflexible (as nucleares non se poden apagar e acender como as centrais de ciclo combinado).   A Xunta debe oporse a este proxecto e a Confederación Miño-Sil denegalo.

Por primeiro ano, durante 2010 a electricidade producida nas centrais térmicas de carbón das Pontes (ENDESA) e de Meirama (Gas Natural Fenosa) foi inferior á exportada desde Galicia a Portugal e ao resto do Estado español. Galicia podería prescindir hoxe da produción eléctrica sucia e ineficiente do carbón e reducir así drasticamente a súa pegada ecolóxica , debida sobre todo ás emisións excesivas de dióxido de carbono (CO₂), o principal gas causante do cambio climático (1). As centrais de carbón de Meirama e As Pontes emitiron en 2010 máis CO₂ que o resto das industrias galegas que participan no comercio europeo de emisións.

Cando se cumpren catro meses do accidente nuclear de Fukushima e cos reactores aínda fóra de control, comezan a calcularse as doses radiactivas que recibirá a poboación. Os resultados mostran que a evacuación se realizou de forma inapropiada e que miles de persoas van recibir altas doses radiactivas.

Ecoloxistas en Acción presentou un informe sobre a iniciativa ecuatoriana ITT-Yasuní de deixar un importante pozo petroleiro sen explotar a cambio do pagamento, en forma de devolución de débeda ecolóxica, da metade dos ingresos que xeraría a súa extracción. Os fondos recibidos servirían para a transición cara a unha sociedade non baseada nos combustibles fósiles. A publicación do informe coincide co anuncio de Alemaña de que non vai achegar fondos á devandita iniciativa e a paupérrima achega do Goberno español de só un millón de euros.