Segundo un estudo ao que fai referencia un informe sobre incendios que vén de divulgar a confederación ecoloxista estatal Ecologistas en Acción, Galicia emitiu máis dun millón de toneladas de carbono por incendios forestais no período 1981-2002, sendo a comunidade autónoma con maiores emisións de gases causantes do cambio climático debidas a incendios. Este feito é a consecuencia de que Galicia teña sido a comunidade con maiores volumes de madeira queimados durante o devandito período.

Organizacións ecoloxistas de ámbito estatal, asturiano, galego e local rexeitan a política de comunicación coa sociedade da empresa NORFOR (Grupo ENCE) e materializan ese rexeitamento na negativa a participaren no encontro organizado pola empresa no seu centro loxístico de Ortigueira para o próximo día 23 de xuño, ao que algunhas destas organizacións teñen sido convidadas, entre elas Verdegaia. NORFOR non permite o acceso a documentación esencial para coñecer a súa xestión e con encontros como éste só pretende disfrazar a súa falta de transparencia.

O vindeiro sábado 16 de xuño, Verdegaia colabora na organización da II  andaina por Congostro en Rairiz de Veiga. Na andaina por esta parte das terras da Limia coñeceremos os seus ecosistemas máis valiosos: carballeiras, soutos de castiñeiros, bidueirais, paisaxes de mosaico e os aínda ben conservados usos tradicionais do espazo agrario. Xantaremos ao pé do Monumento Natural “A Carballa da Rocha”. Atravesaremos as Veigas da Limia, espazo declarado Lugar de Interese Comunitario (Rede Natura 2000) e percorreremos unha boa parte do concello de Rairiz de Veiga, declarado “Reserva da Biosfera” pola UNESCO, xunto con Allariz e A Bola.

Verdegaia vén de se sumar á organización que fomenta o sistema internacional de certificación forestal sostible FSC (Forest Stewardship Council) en España. Verdegaia apoia os Principios e Criterios de xestión forestal promovidos polo selo FSC, que pretende ser unha garantía de sostibilidade para os consumidores de produtos forestais. Porén, algunhas certificacións inadecuadas, como a concedida a NORFOR (Grupo ENCE) en Galicia, ameazan a credibilidade deste selo e aconsellan unha reforma do sistema FSC.