Verdegaia vén de solicitar, mediante a presentación dun escrito á Concellaría de Medio Ambiente do Concello de Redondela, que se tomen as medidas pertinentes para garantir a adecuada conservación dos valores naturais que alberga o redondelano río Fondón, curso fluvial que alberga unha enorme e valiosa biodiversidade ó mesmo tempo que sofre múltiples e diferentes impactos debidos á presión antrópica. 

Verdegaia, o colectivo S.O.S. Courel e Insectarium Virtual organizan o 6 de setembro unha Xornada Fotográfica Testing no Courel. Unha xornada de testing consiste en agrupar a un grande número de persoas para que nunha zona establecida tomen o maior número de fotos dixitais. Durante todo o traxecto vanse facendo fotos da flora e a fauna invertebrada (conforman o 80% da biodiversidade). Posteriormente, un grupo formado por máis de 100 expertos categoriza a información, clasifícaa e catalógaa. Mediante esta acción os colectivos organizadores queren reivindicar a protección efectiva dunha das zonas con maior biodiversidade de Europa, gravemente ameazada polo desleixo da administración e a voracidade das empresas mineiras.

Verdegaia denuncia o selado de antigas explotacións mineiras abandoadas por parte da Consellería de Innovación e Industria sen a realización de ningún tipo de Estudo de Avaliación de Impacto Ambiental xa que estas minas constitúen o hábitat de diversas especies de morcegos, algunhas delas incluídas dentro do Anexo II da Directiva 92/43/CEE, Directiva Hábitats. Estas actuacións destrúen o lugar onde habitan estes seres vivos e poden chegar a selarse con quirópteros dentro.

Verdegaia denuncia que a Dirección Xeral de Conservación da Natureza da Consellería de Medio Ambiente autorizou neste ano a pesca do sábalo (Alosa alosa) a pesar de estar incluído no Catálogo Galego de Especies Ameazadas (CGEA) como especie vulnerable. Desta forma, a Dirección Xeral de Conservación da Natureza non respectou o Catálogo que ela mesma aprobou, o que constitúe certamente un feito moi grave. Verdegaia defende que a conservación das especies e poboacións de peixes fluviais ameazadas non se supedite aos intereses da pesca fluvial. Esta é unha das propostas que presentou para o Plano de Ordenamento dos Recursos Piscícolas das augas continentais que está a elaborar a Consellaría de Medio Ambiente.