A achega ao cambio climático dos coches que circulan polas cidades é enorme. En Galicia, os turismos emitiron 1.602.000 toneladas de dióxido de carbono (CO2) en ámbitos urbanos durante 2007 e todo o tráfico urbano representa o 40% das emisións do transporte por estrada, segundo datos do Ministerio de Medio Ambiente  Se comparamos as emisións do coche no medio urbano coas de industrias individuais, tan só resultan inferiores ás das térmicas de carbón. Alén de contribuír ao cambio climático, o automóbil provoca niveis excesivos de contaminación atmosférica nas nosas cidades.

A confederación estatal Ecologistas en Acción, perante a presentación do Proxecto Piloto de Mobilidade Eléctrica Movele, discrepa dos datos de aforro enerxético facilitados polo  Ministro de Industria. Do mesmo xeito, pon en dúbida que a solución aos nosos problemas de mobilidade veña do lado do coche eléctrico. Máis ben ao contrario.

A presentación o pasado día 3 do Plan de Mobilidade e Ordenación Viaria Estratéxica de Galicia 2010-2015 supón a teimuda repetición dos erros do pasado que nos teñen levado a actual situación de deterioro ambiental, erros que xa recollía o Plano Director de estradas de Galicia presentado polo bipartito na pasada lexislatura. Este novo plano son receitas desgastadas polo uso e reflicte a aposta do executivo galego pola estrada como modo de transporte hexemónico e case único. Este plano pretende duplicar as vías de alta capacidade de Galicia, apostando claramente por dilapidar 4.000 millóns de euros dos orzamentos públicos no transporte por estrada, o máis contaminante, o máis destrutor do territorio, o máis insolidario e o de maior consumo enerxético.

Ecologistas en Acción presentou un informe sobre o contributo do transporte urbano ao perigoso quecemento global. En "Emisiones de GEI del transporte urbano en el estado español" analízase a achega do transporte urbano ás emisións de Gases de Efecto Invernadoiro (GEI) totais de España, e o seu espectacular incremento na última década.