O Goberno central acaba de facer público o Borrador da Estratexia Española de Mobilidade Sustentable. Para Ecologistas en Acción, trátase dunha serie de recomendacións e propostas de actuación que non terán apenas repercusión positiva porque non teñen carácter legal. O Goberno ten a obriga de elaborar unha Lei de Mobilidade Sustentable que reconduza os graves impactos ambientais, sociais e económicos que hoxe por hoxe está ocasionando o transporte.

A deterioración da calidade do aire prexudica a nosa saúde. O tránsito adoita ser a principal fonte de contaminación nas cidades, polo que a mellora da calidade do aire urbano pasa pola súa redución. Respirarmos aire puro e desfrutarmos de ambientes urbanos máis habitables é posible cun modelo de transporte sustentable. Ecologistas en Acción, coa colaboración de Verdegaia, editou un conxunto de materiais (exposición, caderno, folletos) sobre calidade do aire, tráfego e saúde que podes descargar agora no teu computador.

Nas alegacións presentadas a pasada semana, Verdegaia esixe a retirada do Plan Director de Estradas e a elaboración dun Plano Galego de Transporte e Infraestruturas Sustentábel, que priorice a “creación de proximidade” e a redución da demanda de transporte (de forma integrada coa planificación territorial e urbanística), restrinxa fortemente o transporte privado (sobre todo nas comarcas urbanas), fomente a intermodalidade, e logre unha transferencia substancial de pasaxeiros e mercadorías cara aos modos de transporte menos contaminantes (ferrocarril, autobús, bicicleta,...).