Verdegaia-Compostela organiza unha tertulia ecoloxista aberta á que ti tamén estás convidado/a. O tema será "Boas prácticas na vida cotiá ou freakismo ecoloxista?". A tertulia decorre no Pub Paraíso Perdido (rúa Antealtares,3, soto) a partir das 20:30 h do próximo mércores 13 de febreiro. Esperámoste!.

O Concello de Oroso confirmou a distintos medios de comunicación a intención de incluír carrís-bici no futuro polígono industrial de San Martiño II, en atención as alegacións presentadas. Verdegaia presentou esta demanda nas súas alegacións,  na medida en que non se entendía que un polígono industrial situado a menos de 2 km dunha poboación non tivera en conta as posibilidades de desprazamento que ten a bicicleta.

A Xunta non facilita datos sobre a calidade do aire en Santiago desde que  mudou a ubicación da estación de control da contaminación atmosférica desde a Praza de Vigo ao Campus Sur, hai máis dun mes. Por outro lado, segue sen responder á solicitude de información de Verdegaia-Compostela sobre a xustificación técnica do traslado da estación. Ambos feitos levaron a Verdegaia a presentar unha queixa perante o Valedor do Pobo.