O vindeiro mércores 8 de outubro ás 20:30, Verdegaia celebrará no Pub Paraíso Perdido (r/Antealtares,3. Compostela) unha tertulia sobre a relación entre o Ecoloxismo e o Vexetarianismo. Con estas tertulias, que vimos celebrando dende o mes de marzo deste ano, a nosa asociación quere compartir temáticas e debates con todos/as aqueles/as que queiran participar nesta actividade, falando e coñecendo experiencias e actividades de diversa índole Nesta ocasión, o tema escollido é o do vexetarianismo e a súa relación co movemento ecoloxista, tanto no que respecta as súas accións como nos seus fundamentos ideolóxicos e á súa relación coa actual situación do planeta. Esperámoste alí!!

Este domingo Verdegaia-Compostela colaborou no guiado do roteiro polas Brañas de Laíño co clube das Fontiñas. Xuntámonos unhas 50 persoas e a cousa dou moito de si, ampliouse a visita á eira dos horreos de Imo e á aldea de Castro co que chegamos aos 22 km. A Braña sempre nos sorprende e nos acolle, esta vez foi un xuvenil de garza real (Ardea cinerea) que amosou moito interese nas actividades de Verdegaia e foinos pispando sempre uns metros por diante nun bo treito da camiñada á altura das Avesadas.

Coñece en tren e a pé un dos espazos húmidos intermareais máis extensos, descoñecidos e de maior valor ambiental de Galiza. É o habitat de máis de 60 especies de aves entre as que está a escribenta das canaveiras, unha reliquia destas brañas que está en perigo de extinción, ou a folosa acuática, tamén ameazada. A foz do río Ulla é tamén o escenario de antigas e modernas referencias literarias, misteriosas lendas e o sustento de ancestrais actividades humanas que se coñecerán neste roteiro.