O L.I.C. Costa Ártabra repártese polos concellos costeiros de Ares, Mugardos, Ferrol, Narón, Valdoviño, Cedeira, Cariño e Ortigueira. Trátase dun tramo de costa moi variado en canto a ecosistemas se refire, albergando areais, cantís, humidais, pequenas illas e mesmo serras, e que conforman un espazo único integrado dentro da Rede Natura 2000. O tramo de costa que imos percorrer correspóndese coas zonas costeiras de Sta. Comba, Sartaña e Ponzos, na parroquia ferrolá de Covas. Ademais dos seus valores ambientais e patrimoniais, queremos salientar as múltiples agresións que ameazan a conservación deste espazo protexido como é o proxecto de parque acuícola ideado para Ponzos.

O núcleo comarcal de Verdegaia para as comarcas de Ferrol, Eume e Ortegal ven de presentar unha solicitude ante o Concello de Valdoviño e ante a Consellería de Medio Ambiente para que ambas administracións tomen as medidas necesarias que conduzan á rexeneración ambiental dunha canteira abandonada nese concello. Dita canteira presenta unhas características hidrográficas e xeolóxicas que fan dela -se se toman as medidas que propoñemos- un biotopo ideal para invertebrados acuáticos, anfibios, réptiles e aves (rapinas e acuáticas).

Demarcación de Costas promoveu a rehabilitación da Ponte Metálica do Barqueiro. As obras desta rehabilitación están xa moi adiantadas e se ben valoramos moi positivamente a recuperación da Ponte Metálica do Barqueiro, dado o seu valor histórico e arquitectónico, certas intervencións non son, ao noso entender, as máis axeitadas e están a ocasionar o deturpamento do deseño orixinal desta ponte do século XIX.