Hoxe a mañá recibimos a triste nova da morte de Ramón Fernández Durán, intelectual de referencia do ecoloxismo social e membro de Ecologistas en Acción. Os seus máis de 30 anos de activismo nos movementos sociais e a súa enorme capacidade intelectual convertérono nun referente fundamental para o ecoloxismo social e un mestre para calquera que quixera albiscar a realidade agochada detrás da economía capitalista e a súa responsabilidade na crise ecolóxica global. Dende Verdegaia queremos enviar unha forte aperta a súa familia e amigos e particularmente aos compañeiros e compañeiros de Ecologistas en Acción. Estamos convencidos que o exemplo do seu compromiso e a guía do seu pensamento axudaranos no noso traballo diario a prol dunha sociedade máis sustentábel, xusta e pacífica. Até sempre, Ramón.

Este domingo, 15 de maio, Verdegaia organiza un novo roteiro dentro do seu programa Vai de roteiros. Neste caso, percorreremos a beira esquerda do río Miño ó seu paso pola cidade de Ourense ata a zona de Untes.

En novembro de 2003, o concello de Compostela optou por se adherir a SOGAMA para a xestión dos RSU (residuos sólidos urbanos) nun pleno en que non se admitiu público e coa porta de Raxoi bloqueada por decenas de policías locais á espera de non se sabe qué. A maioría d@s representantes decidiu meter a capital de Galiza nun sistema xa naquel momento colapsado e fracasado, mais que ofrecía un prezo «político» por un servizo de xestión dos RSU que non se realiza efeitivamente; un prezo que, por certo, ten aumentado cos anos, por non falar das contrapartidas que a Xunta ofreceu ao concello por baixo da mesa.

Segundo os datos divulgados na web da Consellería de Medio Ambiente,as emisións de dióxido de carbono (CO₂) dos sectores industriais aos que se lles aplica a Directiva de Comercio de Emisións reducíronse en Galicia nun 17,2% durante 2010 a respecto de 2009. A caída das emisións acumulada desde 2007 é practicamente do 50%. O recorte foi aínda maior no sector  eléctrico, que aínda así é responsable das dúas terceiras partes das emisións totais. A central térmica de carbón de ENDESA nas Pontes emitiu durante 2010 tanto CO₂ coma o resto das industrias galegas que participan no comercio europeo de emisións.