A Federación Ecoloxista Galega quere saír ao paso das declaracións do presidente da Xunta sobre a ausencia de impacto ambiental da piscifactoría de Touriñán. A FEG lémbralle a Feixóo que tódalas actuacións sobre o medio ambiente teñen impacto ambiental. Resulta imposible non recoñecer a presenza de impacto ambiental salvo que se queira enganar vilmente aos cidadáns.

Verdegaia Compostela ven de presentar alegacións ao "Plano especial de ordenación, protección, mellora ambiental e acondicionamento das brañas do Sar (PE-3R) de Xuño de 2009 - Documento de Inicio" promovido polo Concello de Compostela e en fase de consulta para a Avaliación Ambiental Estratéxica. Este plano afecta un espazo que polo de agora, e por desgraza, non presenta ningún tipo de protección a pesares de ser un espazo de elevado valor ambiental e paisaxístico dentro da área urbana de Compostela, e que xa ten sufrido numerosas intervencións moi criticables desde o punto de vista ambiental (incremento da superficie construída dentro da bacía, incomunicación provocada por diferentes infraestruturas lineais, contaminación persistente e difusa nas augas, etc), dos que en grande medida foi ou é responsábel o propio concello.

As emisións de Gases de Efecto Invernadoiro (GEI) en Galicia aumentaron o 23,4% entre 1990 e 2007. Este e outros datos recóllense no informe  "As emisións de GEI en Galicia (1990-2007)", no que se difunden publicamente por primeira vez datos sobre as emisións en 2007. As emisións de GEI en Galicia incrementáronse menos que en España pero  máis  que  no conxunto dos países desenvolvidos. As centrais térmicas de carbón achegaron o 39,5% das emisións en 2007. O transporte é o sector onde máis aumentaron as emisións desde 1990.

A confederación estatal Ecologistas en Acción, perante a presentación do Proxecto Piloto de Mobilidade Eléctrica Movele, discrepa dos datos de aforro enerxético facilitados polo  Ministro de Industria. Do mesmo xeito, pon en dúbida que a solución aos nosos problemas de mobilidade veña do lado do coche eléctrico. Máis ben ao contrario.

A iniciativa de Verdegaia, Amigos da Terra e Greenpeace, vén de se constituír a Alianza Galega polo Clima, unha alianza aberta de organizacións sociais que nace co obxectivo de fortalecer a resposta social ao desafío da mudanza climática. A Alianza acha que Galicia é parte da crise climática global e que debe asumir a súa responsabilidade na redución das emisións de gases de efecto invernadoiro, apostando por unha economía baixa en carbono que sexa sustentable e xusta. Podes ler a declaración de principios e intencións no blog da Alianza Galega polo Clima.

Comeza o curso e retomamos  o programa de obradoiros de "Cociña responsable-mente". Este mes realizaremos o nº3, doces e merendas, no que elaboraremos receitas con doces alternativos ( xiropes, melazas, estevia,...) ao azucre habitual, por toda a súa problemática de cultivo, produción e saúde. Tamén realizaremos patés e pastas con materias máis próximas e de tempada (algarroba, mazás,...). O obradoiro realizarase o venres 18 de setembro, de 19'30h a 21'00h no local da Troita Armada, rúa do pombal 18. Podedes anotarvos en Este enderezo de correo-e está protexido contra spam bots, necesitas ter o Javascript activado para podelo ver   ou chamando ao 676029049 (Sabela). Hai límite de prazas, así que pedimos a familias e/ou parellas que se anoten un só, e que vos anotedes se realmente podedes vir. Queremos darvos as grazas pola vosa participación e informarvos de que podedes consultar nesta páxina algúns dos contidos .