O roteiro atravesa principalmente bosques de ribeira e ten certo interese ornitolóxico (especies presentes: merlo rieiro, martin  peixeiro, azor, gabián, as dúas especies de gabeadores e as 5 de páridos).  Durante o camiño toparémonos con até 5 muíños, aínda que o principal  protagonista é un foxo onde hai un par de séculos aínda se cazaban  lobos. Este tipo de estruturas cinexéticas forman parte da nosa cultura,  da cultura asociada ao lobo e dos mitos que o envolven. Despois do  roteiro habrá unha pausa para xantar na sede que nos presta desinteresadamente a asociación Canón de pau e na cal terá lugar a  ponencia-charla sobre a conservación do lobo en Galicia, que versará sobre os aspectos mitolóxicos que persisten na mentalidade da xente co  fin de romper eses mitos. A ponencia durará sobre unha hora con rolda de  preguntas incluída.

Domingo, 20 de decembro. Saída ás 10:30 dende o Pavillón de Deportes de Pontevedra. O roteiro fai un percorrido didáctico polos foxos onde se cazaban os lobos explicando que son estas estruturas cinexéticas e como se usaban. Ademáis durante o camiñada practicarase a identificación de  aves polo seu canto. O roteiro durará 3 horas aproximadamente. Tras o xantar o guía, Rubén Portas, dará unha charla sobre a conservación do lobo.

Por iniciativa da Alianza Galega polo Clima -constituída hai 3 meses por Amigos da Terra, Greenpeace e Verdegaia- diversas organizacións sociais e plataformas cidadás galegas asinaron un manifesto baixo o lema "Sustentabilidade e xustiza contra a crise climática". Coincidindo coa recta final do Cumio do Clima de Copenhague, estas organizacións demandan a nivel internacional e galego a adopción de accións efectivas para previr unha mudanza climática catastrófica.

 A Rede Galega Anticapitalista, da que forma parte Verdegaia, presentou en rolda de prensa a súa convocatoria para sumarse ao Día de Acción contra o Cambio Climático, que se celebra en todo o mundo o sábado 12 de decembro. Unha marcha ciclista discorrerá polas rúas de Santiago baixo o lema "Mudemos o sistema, non o clima".

As emisións de dióxido de carbono (CO₂) procedentes de combustibles fósiles (carbón, petróleo, gas natural) aumentaron en Galicia o 24,8% en 2007 a respecto de 1990, o ano de referencia para o Protocolo de Quioto. Pola contra, os Estados desenvolvidos que ratificaron este protocolo  diminuíron as emisións un 9,4% por termo medio durante o mesmo período. As nosas emisións por habitante de CO₂ debidas á queima de combustibles fósiles son superiores ás emisións medias da UE.