Realizarase o domingo 3 de setembro, aberto a todo aquel que queira coñecer as paisaxes e hábitats desta zona do concello de Nigrán, ameazada polo proxecto dun campo de golf. Ademais, aproveitaremos o roteiro para facer unha limpeza nas covas do Folón. Sairemos da igrexa de Coruxo ás 10:00. O roteiro durará todo o día. Cómpre levar comida, calzado axeitado e luvas para a limpeza.

Empregando datos oficiais, o informe de Verdegaia "Unha catástrofe incendiaria sen aclarar" pon de manifesto a dimensión da catástrofe provocada polos 1.970 lumes que arrasaron 77.772 hectáreas entre o 4 e o 15 de agosto, un episodio especialmente grave dun desastre ambiental que se repite ano tras ano. Verdegaia, alén dunha nova política forestal, esixe a máxima transparencia sobre a vaga de incendios e a resposta institucional.

Verdegaia Ferrol, Eume e Ortegal, moi sensibilizada co grave problema dos lumes, decidiu organizarse xunto coa SGHN e ADEGA para tentar mitigar os efectos de máis lumes nas nosas comarcas. Para isto formouse un dispositivo de vixilancia dos montes e alerta rápida ás autoridades. Este dispositivo consiste en grupos de voluntarios/as que de forma totalmente altruista adican parte do seu tempo libre a percorrer os montes provistos duns prismáticos e dun móbil. Pretendemos, deste xeito, alertar o máis axiña posíbel a bombeiros e brigadas contraincendios no caso de lume. A lista de voluntarios/as continua aberta e para colaborar só hai que chamar ao teléfono 981 35 28 20 en horario de mañá. As labouras de vixilancia continuarán até finais de setembro.