Verdegaia-Compostela denuncia que, de acordo cos datos sobre a calidade do aire en Galicia en 2006 divulgados pola Consellería de Medio Ambiente, no municipio de Santiago incúmprese a lexislación sobre calidade do aire. No centro da cidade superouse un valor límite para o dióxido de nitróxeno (NO₂), mentres que no contorno da empresa madeireira FINSA excedéronse os valores límite para partículas en suspensión. A deterioración da calidade do aire é un problema ambiental e de saúde pública.

O pasado luns 10 de Setembro, o Instituto de Estudos Miñoranos, o Grupo Ecoloxista A Groba,  Salvemos Monteferro, o Clube Espeleolóxico Mauso, representantes de diversos partidos políticos, comuneiros das parroquias afectadas polo parque eólico "Albariño I" e representantes de Verdegaia, asistimos a unha xuntanza da que nace unha nova organización, co obxecto de protexer a Serra da Groba da iminente ameaza que supón o proxecto de parque eólico. 

A Federación Ecoloxista Galega (FEG), xunto coas asociacións ADENCO e APDR, organizou para os sábados 29 de setembro e 6 de outubro na cidade de Pontevedra unha xornada formativa na que se amosarán as ferramentas que o Dereito Ambiental fornece a calquera persoa ou asociación preocupada pola protección do medio.

Verdegaia ven de presentar alegacións á construción deste Parque Eólico situado nos Concellos de Baiona, Gondomar, Oia e Tomiño. A súa construción significaría afeccións a espazos considerados hábitats prioritarios pola UE e un importante impacto faunístico, ademais de afectar a Cova da Moura, ás Mámoas do Arreiro e a distintos grupos de petroglifos.