Hoxe xoves 15 de novembro Verdegaia Ourense celebra a terceira convocatoria do mercadiño de troco, desta volta no Local da Asociación cultural A Esmorga, na Rúa Telleira 9, na zona da Universidade, a partir das 20:00 horas. 

O apagón "Fronte ao cambio climático: actúa xa" é unha iniciativa cidadá convocada por 152 organizacións e entidades de todo o Estado español, entre elas Verdegaia. Celebrarase mañán 15 de novembro, de 20:00 a 20:05 h, e o seu obxectivo é sensibilizar sobre a necesidade de adoptar medidas urxentes perante a ameaza do cambio climático. Verdegaia demanda accións para reducir as emisións de Gases de Efecto Invernadoiro (GEI) desde Galicia, que aumentaron un 30% entre 1990 e 2004. 

A Xunta non facilita datos sobre a calidade do aire en Santiago desde que  mudou a ubicación da estación de control da contaminación atmosférica desde a Praza de Vigo ao Campus Sur, hai máis dun mes. Por outro lado, segue sen responder á solicitude de información de Verdegaia-Compostela sobre a xustificación técnica do traslado da estación. Ambos feitos levaron a Verdegaia a presentar unha queixa perante o Valedor do Pobo.