Verdegaia manifestouse en maio de 2007 en Mariñamansa por causa das chemineas ilegais que Mercadona colocou nunha zona verde e de ocio e entre os edificios, que ía expulsar directamente ás casas dos/as veciños/as todos os fumes do supermercado e do aparcamento soterrado. 

Na procura de afondar nos procesos como as moedas alternativas, as redes de troco e aquelas iniciativas que recuperen a centralidade das persoas dentro dun proceso económico alternativo que aposte polo local e polas redes sociais na vindeira semana celébranse dúas xornadas. As Xornadas "Creando Economías Sostíbeis" na Coruña e as IV Xornadas de Economía Alternativa en Lugo, nas que participa Verdegaia presentando a experiencia dos trocos. 

Un membro de Verdegaia Ourense informou hoxe de que se produciu un novo vertido no río Arenteiro que produciu a morte de moitísimas troitas na piscifactoría da Carinza, que agora se están retirando de alí. Verdegaia denuncia unha vez máis a falta de control suficiente do estado dos acuíferos e de todas as correntes de auga, que reciben día tras día vertidos de diferentes fontes e tamén día tras día vemos como a Administración non pon solución a esta situación. 

Verdegaia denuncia a súa exclusión inxustificada do Consello Municipal de Medio Ambiente por parte da Concellería de Medio Ambiente e Desenvolvemento Sostible, á fronte da cal está a concelleira Elvira Cienfuegos. O Concello non informou a Verdegaia do proceso de renovación dos membros deste Consello, que tivo lugar no último trimestre do ano pasado, polo que non tivo a oportunidade de participar na escolla dos tres representantes dos grupos ecoloxistas de Santiago que forman parte do Consello. A actitude de desprezo cara a Verdegaia amosada por Elvira Cienfuegos é sectaria e antidemocrática.